韓國Grad Trip。Day12。Part1 南怡島

526(六)
★Day 12★︰南怡島—>戀歌之家lunch—>小法國—>新村春川炒辣雞
我地平時都好遲出門 今日要去南怡島已經早左
約左9點係弘大地鐵站等~
但去到南怡島已經12點半啦
我見人地好多都係7點幾就出發 我地真係好遲…

我地為左慳錢…所以冇搭ITX
只係搭地鐵去 所以要用多D時間。。。

到左加平站啦～好多人

之後去對面諗住搭巴士～但等左一陣都冇車。。。又唔知架車係咩樣
我地一行９人　所以最後搭的士去。。車費５１００won一程
加平站去南怡島碼頭好快～好似只係５min就到啦～
到左碼頭見到有薯仔同栗米賣。。
買左薯仔試下。。好味呀～好淋好香！

之後買船飛啦～８０００won




船上有好多國旗架～

朋友本來想搭上面的吊車去南怡島~但我覺得好貴呀~好似要2XX港幣
而且有D恐怖..因為只係坐係椅上凌空咁飛過去><

有人玩水上活動~

開始埋岸啦~

到達~我好期待去南怡島架~
因為呢度真係好靚。。四季有不同景色～

NAMI ISLAND的全島圖～

開始行啦～見到紅葉
夏天都間唔中會見到一兩棵紅葉架！

沿住中間的大路行～
兩邊有好多特色小店和食店
呢Ｄ應該係銀杏樹？真係好高呀～

冬季戀歌係度拍～
當場唔少得佢地的景點啦～

我都係當時先知南怡島係共和國

由於大家都冇咩食野～所以要搵食啦～
南怡島都好多餐廳可以選擇
我地打算食戀歌之家的回憶便當

都搵左一陣。。因為門口唔係對住大路～
見到呢個水池轉左就會見到戀歌之家。。

戀歌之家有室內同室外座位～
好多人幫襯架～我地去到已經冇位
要自己搵位架～跟住排隊買野食～
之後叫ＮＵＭＢＥＲ出去拎

ＭＥＮＵ木牌仔好得意︿︿
有英文架～唔怕唔識韓文叫唔到！

因為我地太多人所以分開坐～
我地４個人叫左２個回憶便當+1個泡菜煎餅share

呢個回憶便當即係miss lee星星茶坊的搖搖便當
個鐵盒好熱架～搖之前可以出去拎手套～
我覺得miss lee的便當好味Ｄ呀～而且多Ｄ材料！
泡菜煎餅都唔錯～不過我未試過其他的。。

食飽飽就分頭行事啦～
因為我同３個朋友帶左畢業袍黎影相　其他朋友冇帶佢地會周圍行下～
我地又打算今日去埋小法國　要搭３點幾的巴士去
約左兩點半係碼頭等。。所以只得一個鐘時間影相同行下
有２個朋友對小法國冇咩興趣　所以會留係南怡島玩

去到呢個草地開始影畢業相啦～
韓國人真係好鍾意一家人係草地野餐hea下。。好relax

一片綠油油
影相好靚呀！！！本來諗住快快影會有時間行下
點知都影左好耐。。。
所以最後我係冇咩行過南怡島架＞＜
其實呢度真係有好多野可以睇可以影
可惜今次唔夠時間～
我一定會再黎南怡島！下次要早Ｄ出發呀！！！

夠鐘就搭船出去～因為朋友遲左返黎
我地落左船已經差唔多３點３啦～搭唔到3:15呢班就要５點幾先有車
但我地又唔知個巴士站係邊。。又唔知架車咩樣
而且由南怡島去小法國都要一個鐘。。搭的士好貴
所以當時諗住巴士走左就唔去小法國啦～
最後搵到巴士站係7-11對面 等左一陣有車黎呀～
實在太好啦～睇返車上面貼住的時間表有Ｄ唔同。。係遲少少ge
所以我地遲左都有車搭～
但車上好多人。。我地企左差唔多一個鐘先到小法國